Drei Daag offe
 |
(Blaggedde normal) Si, i muess grad zerscht am Aafang do, mi entschuldige und zu mim Fäähler stoh! He woni d Yygoob gmacht ha bim Comitee fir d Blaggedde, hani uss Verseeh, nit my Graafig gschiggt, wiemes sett erwarte, sondern e Zaichnyg vo mim Sohn ussem Kindergarte! |
 |
(ally Männli in schwarz,rot, gold) Däm arme Schwoob hets dr Grind verjaggt, well d Merkel het dr Wahlkampf paggt. Jetzt glaubt e Männgge dert z Berlin die haig kai Ahnyg und kai Schyyn do maint dr Wägmacher Sepp: He, das syy no Affe! ich muess z Hobel scho lang mit Merggel schaffe! |
 |
(E Poulet im Welggli) Das draumend Mondgsicht do mit däm Laaryfaary isch unsry lieby Zanolaari. Die schlooft im Roothuus uffme Campingbett, will men ihre s Haimgoo verbotte het! das deent zwor hart, aber s isch z verstoo, well me d Hyener nimm derf uuseloo! |
 |
(Männli rot-wyss / blau-wyss) Jetzt hän doch die drey Bolyzischte doo en umgschpritzte Schrooterkaare byko nimmy blau-wyss sondern wyss und root, wells Blaufahre dr Bolyzey nit stoht! Jä fir mi macht dä Wäggsel nit vyl Sinn: S hoggen allewyl no Schugger dinn! |
 |
(En Aquarell im Welggli) Gsesch au uff däm Helge, das Welggli - das syesse? und wie die Farbe zämmeflyesse! und all die Forme, wos innre Aug kreyert? Wirsch in höchery Sphaere katapultiert! Das isch nit dr Hoffmann uff eLeSDe! Nai i ha nur sney Logo vom Schwyzer Färnseh gseh. |
 |
(Blaggedde mit emene Halsband) Jetzt wänn doch die Politikerniete mir mi Daggeli verbyete! und alles nur wägem Trottoir-Rand bym Seyby – si, dasch allerhand! He bis mi Fifi dert uffekunnt, het är e soone Kampf dä Hund! |
 |
(E Bischofsblaggedde) Dr Bischof Kurt – dr Koch vo Basel isch nimm so gfrogt mit sym Gefasel! will är entpuppt sich mehr und mehr als Depandance vom Ratzing-eer! nur guet schnuurt är nit de Baizer dryy, sunscht miesst dr Ainhaitsstuehl zum gneyle syy! |
 |
(die goldygy Blaggedde) Mir hätte doo zum Schluss e Bitt: Gän sy uns bitte ally ihri Blaggedde mit! Mir schängge die denn immene Maa, däm gohts schlimm! Hejo, dr Hamatschu tschutschuulet nimm! Denn hätt är zmindescht – das wär dr Waahn – E Huffen Yyse – au ohny Bahn! |
|
(Noochvärs) Dä mit däm Helm wo do duet zhinderscht floohne, isch dr Jögge Schild – die Sportskanoone. Dä goht zu Schwyz – Olympiaa denn derte kunt är super aa! Är het Konditioon, das isch z erkenne, vom de Gfängnisflichtling noocherenne!
|
|
|
Mir hän d ´Blaggedde inre grindlige Pryefyg unterzooge, hänse aagluegt und studiert und dr Inhalt gwooge. S Ergäbnis denn – si sisch fatal: kinschtlerysch kataschtrophal! Vom Witz här schal – banal – e Quaal Also ´gnau glyych wies ney Cafy Bâle’! |