BAFA 2018

Bis zur näggschte Fasnacht

19.02.2018

Mr freyen is scho!

Noch



Countdown
abgelaufen


CDUB - CountDown-Up Big

Was isch das?

Isch jo logisch: E Dichter halt, wone Zeedel dichtet!

 

Fir Nid-Basler: „Dr Zeedel“ isch e maischtens lengligs Schtigg Babyyr, wo druff in Värsform s Thema (Sujet) vo dr Clique uffgriffe wird.

 

Doo drbyy derfs bissyg syy, s derfen aber luschtygy Sequänze drin vorkho… wies halt grad zum Thema basse duet.

 

Bymene guete Zeedel wird s Sujet au mit meegligscht vyylne aggduelle Sächeli uss dr Polydygg oder regionaale Gschehniss verbunde.

 

Zuedäm isch ooben uffem Zeedel ersichtlig, welly Cliquen en verdailt und welles Fasnachts-Joohr dass es isch.

Zunderscht gits ammen e Hiwyys uff d Latärnenusschtellyg oder mängmool au e weeneli Wärbyg fir e Noowuggs.

 

Dr Zeedeldichter blybt, wies an dr Basler Fasnacht allewyl iblig isch anonyym!

(Yygweihty und gschtandeny Fasnächtler erkennen aber ammen anhand vom Schtil, uss wellere Fäädere die Värsli schtamme)

 

 

Wurum die Sytte?

Mänggmool kunnt e Clique in d Laag, ass ihre Zeedeldichter grangg wird….

Oder s wogt sich aifach niemerts vo de Kolleegynne und Kolleege draa….

Oder s fallt em Cliquezeedeldichter aifach nyt Gschyyds yy…

 

Drum: Bruuchsch Hilf?

 

S git e huffe gschtandeny Schtadtpoeete, wo doo ammen yyschpringe!

 

Die maischte findet men im Umfäld vo de Schnitzelbänggler oder vo de bykannte Lyteraate

 

 

Byschpyl und Keschte?

De kasch dr jo dängge, ass d Cliquene nit gärn verroote, welles ihry Värsliquellen isch…. Drum nur e glaine Usszug usseme Zeedel:

……

Doch gohts um d Fasnacht – fir „Gross“ und „Stumpe“

leehn sich d Waggis scho nit lumpe!

Si verdayle ohny z frooge

(E jeedy Froog wär doo doch glooge!)

Räppli grad im Multiphagg!

…Wenns muess syy, e ganze Sagg…

Und kenne soo denn noo dy noo

dr Wirtschaftsgryyse e Schnippli schlooh!

 

Denn wär will wäg dr Wirtschafts-gryyse,

uns Basler Waggis d  Faasnacht vermyyse?

 

Denn ally wo soo Räppli tangge,

hänn zämmezellt e mängge Frangge

in ihrem Wintermantelkraage,

wo sy dangg uns dien ummetraage!

Do maint e Frau im graue Nerz:

„Ich wär vyyl lieber dr Herr Merz! –

Dä bykunnt drum bym Gadhaffy

zmindescht noone Tasse Kaffy!“

Fir unserains isch s aber klar:

Nit Merz! Mir fyyre im Februar!

Und zwar am Schluss vom Moonet Hornig!

- doo isch fir uns no d Wält in Ornig!

Au wenn ally Berse-indyzees

maine, s wurd mit dr Wirtschaft bees!:

 

usw. usw. usw.

 

S kunnt allewyl d Froog noo de Keschte!

Doo zellt ai Gsetz: Die maischte Zeedeldichter hän nyt geegene guet Wysse!

Groossy Cliquene hän mänggmool e Bydschet-Poschte, denn gits jee noo däm e Guetschyyn drzue.

Glainy Grubbe, wo soowyso am Hungerduech naage, leehns aifach syy (usserem Wyy).

die Antiquierte Template by Stefan Ruede Powered by Joomla!