Mir kaufe ehnder im COOP yy
Unsere Frind isch meh bym Migros drbyy!
Unsry Frindyn gooht lieber bym Volgg-Laade yyne ...
Das macht dr Putin au, in dr Ukra-yyne.

 Me waiss vo Basel bis Filisur:
Isch d Milch bitz alt, denn wird sy suur!
Doch au by Jung-Gmies schtoohsch im suure Rääge!
Mir sage nur: FCB und David ..... (Dääge)

S git Krieg, Corona und Grippe-Wälle,
S git Linksradikaal und Tryychler mit Schälle ...
S git Unguets grad in e jeedem Land!
Als neutraale Schwizer: Ins Näscht! Guet Nacht mitnand!

In dr Drämmlischiine e Gummi-Band!
Und scho schletzts d Velo nimm ummenand!
Soone Gummi duet fir d Velo nitze!
... nur wär duet uns vor de Velo schitze?

Läggerli, Pfyfferli, Charyvary,
Drummeli und Laryfaary ...
au s Kirsyschtayschpuggerli isch nid dr Hit!
S wird Zyt, dass es wider Fasnacht git!

Ych bi vyyly hundert Kilomeeter
gfahre mit Huupe, Stau und Gezeter!
Nid uff Süditalie mit Geeschte und Flueche,
sondern by mir dehaim bym Parkplatz sueche.

Hey isch dodaal grass, hey Maann – hey Aalde!
Wien ihr könnet aldy Gschichte gschtaalde!
So mid Heidi und Dings ... zwüsche Geisse und Kuehli
und zwüschedrin dr Schälle-n-Ueli.

Im letschte Joohr machts Gäähn und Päng
zwischen em Berset und em Parmöläng ...
Mir fändes doo grad ächt dr Hit,
wenns für dr Parmoläng e Energetisch-Booster git.

Oh eFCeBe, oh eFCeBe,
oh eFCeBe, oh efCeBe,
oh eFCeBe, oh eFCeBe,
wenn hämmer dy s letscht mol gwünne gseh.