Dr Schuss isch duss!
 |
(Ally drey Blaggedde) Syt Joohre isch es schon esoo: Mr hän s Sychet als Vorlag fir d Helge gnoo! Und jetzt dä comiteelig Saych vo drey Blaggedde: biirewaych! Vo uns uss kenne die 10 so Blämbbel bringe! Jä denn gheersch ys halt 10Mol lenger singe... |
 |
Nonemool ally drey Blaggedde isch klar eine vom eFCeBe! Und dädo isch vom EHaCe und draumt vomene Joggeli Yys - ok! Und die ischs wo im Byllyeehyysli stoot, well me wott se nimm im Regyerygsroot! s wird im Jokeb widr balleret numme nimmy g schalleret! |
 |
Big Brother-Kamera Luegsch au gärn zue, wenn ain muess brunze, wenn ain nochem schloofe sich streggt und duet grunze. Oder gnayssysch gärn, wenn ainen isst - wenn e Paar bim kopuliere sich und d Wält vergisst... Au mir sinn drby - wisse gnau was lauft! Mr hän en Abo fir dr Zolli kauft!
|
 |
Dr Waggis het Balleen Syt neyschtem isch s Kindercharivari im Stadttheater - so erfaahr y! Dert isch s Theaterteam im Foyer uss, fir unsri Binggis voll im Schuss. Tuet mit Charme, Witz und mit ere Gugge S Niveau vom Theater uffedrugge! |
 |
E Straigg-Blaggedde Die Kunschtmuseumsdiräggdoorewahl dunggt ys politisch luusch und schaal. Au d Kischpi-Standortdiskussioon het gwiss e unsteryle Doon. En Innerstadtdemo zer Wyehnachtszyt isch verbotten aber nit fir alli Lyt. Oder s Nai zem Vegetaaryer Gleich isch Dräggsalaat und biirewaych! Das Schindhelmbuff um dä Stasibrey mahnt ain an Schindluederey politisch ischs im Momänt esoo: S stooht nit ganz alles suuber doo! By so vyl Drägg - het d Erfaaryg zaigt, kas gäh, ass d Wöschmaschine straiggt! |
 |
Dr Harlekin im Computer Fir dr Becker macht die Internetwärbig Sinn - he dasch die gsi mit em ‘Ach bin ich schon drinn’. An däm Boris-Niveau gseht mes aa, ass die Soohmeraubgschicht nit stimme kha! Das Buschi isch vo ihm - das isch sunneklar! Nur kan är sich nit erinnre ‘wann er drinnen war’. |
 |
Nonemool dr Harlekin im Computer Wotsch hitzuetags e Kääferli sueche, muesch nimmen inre Disco rueche! ‘Flexisch’ voll ‘relaxed’: luegsch in PeCe dryy und ‘linksch’ dy ‘at home’ ine Chatroom yy. E ‘virtual flirt’ voller Härz und Schmuus - bis de merggsch s isch dr Bueb vom Noochberhuus. |
 |
Scho widr ally drey Blaggedde Mir hätte doo zem Schluss e Bitt: Gän sy uns ihry drey Blaggedde mit. Und ally wo sy sunscht no finde, mr wänn sy drum ally zämmebinde! Und wiggle si em Blocher umme Ranze drum, als Schwimmhilf bim näggschte Limmatschwumm. |
|
Zusatzvärs Erneyeryg bruuchts, jä das muesch gseh! Dä Grundsatz gilt au fir d BeVauBe! Drum kauffe die so frisch und stramm so tatzelwurmigy XL-Tram. So passt sich allem Aaschyyn aa d Tramlengi de Wartezytte aa!
|
|
|
Nonemool e Zusatzvärs Es funkt dr Trämlifyerer froh: Hallo Leitstell ich bi kho. I fyhl mi ainsam bim Trämlifyere, drum tueni e weeni omanipuliere: So in voller Fahrt, das isch e Gnuss und zur Fasnacht passts: Dr Schuss isch duss! |